[遊記像鐵軌一樣長] - 值得一試嘅新派傳統峇里菜 Republik 45

網上資料圖片

Hi，又係我呀
我知道我好懶，上次去峇里之行所食過嘅所有美食，我拖到幾乎當日食材再投多兩次胎都仲未寫出黎
但係無計，臨近年關，小寶寶工作實在有少少繁忙....:P

入正題

一直以來，其實對果d所謂「新派」或者係咩 "Fusion"嘢無咩好感
感覺上，大家都係搵藉口將原來好地地嘅食物攪到人唔人鬼唔鬼咁，求其放舊西式食材入碟咕嚕肉再搵個懶靚嘅碗仔裝兩粒比你，就叫Fusion

呢間係Seminyak最新開嘅Republik 45由我當地朋友極力推薦
話佢最新開幕，食傳統峇里菜但係又新派又潮嘅地方
老老實實，我唔係真係咁鐘意食印尼菜 / 峇里菜，亦唔係太鐘意「新派」呢兩個字
結果去完之後，佢絕對係令我對新派峇里菜大大改觀 :)

[遊記像鐵軌一樣長] - 名過其實的薯仔頭 Potato Head Beach Club

如果係外面睇，佢個外圍係的確幾有特色嘅.... (圖片來源: Potato Head Beach club)

早幾日睇日曆先發現，我仲有六星期就會再去峇里
而我上一次去嘅遊記竟然三分一都未寫好...


無論你係睇台灣嘅峇里旅遊blog, 而或者係閃令令旅遊書
佢地都會話你聽Potato Head Beach Club係如果你第一次去峇里，必須要去「朝聖」嘅一個地方
我印象最深刻係香討甚至有巴打話，如果你係帶埋囡囡去峇里，想威威比佢睇，就帶佢去薯仔頭啦!!!

我身為一個囡囡，去過幾次峇里，之前成日經過薯仔頭，都唔知點解無乜衝動好想入去

今次去完，身為囡囡嘅我唔覺得帶我入去嘅仔仔好威威
淨係覺得可能我真係老喇，對人多擠迫嘅地方接受度大大下降

Potato Head Beach Club係Seminyak (水明漾區)，隔離就係W Hotel同埋最新開嘅Alila Seminyak；所以如果純粹用欣賞日落嘅角度黎睇，三間都差唔多

[遊記像鐵軌一樣長] - 令你覺得世界還是美好的 La Laguna Bali

龜一樣又慢又長嘅遊記持續進行中......

心心心心眼!!!!!

今次去峇里，我心目中最最最最最最最重要嘅一個行程，同埋我一直尖叫住要去嘅地方

各位朋友～誠意同大家介紹～～～La Laguna Bali ！！！！




呢個絕對唔係旅遊團會帶你去嘅地方，因為條路太窄大車入唔到
但係如果你係女人，仲要係一個港女 (我認我係)
呢個係你必須要去打卡同埋upload相上instagram嘅地方!!!!!

[遊記像鐵軌一樣長] - 加魯達航空(Garuda Airline)初體驗

身為一個港女，呢個時候打卡是常識吧

今次嘅峇里之旅實在有太多太多嘅事想同大家詳盡分享，

只可惜番黎之後我同佢之間傷了和氣，所以無乜心情….;(

今日小寶寶決定無論係點，都要的起心肝將我行程些牙出黎，

做人要振作dd, 先至得人鐘意！

講番正題

以往嘅我對國泰一直有種情意結，無論係自己去玩又好、出差又好，

都會盡量選擇番搭國泰 (雖然我認真地覺得佢飛機餐堅難食)

但係今次由於價錢真係平嘅關係，第一次試搭Garuda Airline

我去果段日子間住10月1號+中秋長假，國泰個價錢癲到要差唔多8千幾，而Garuda Airline連稅都只係3000蚊..

咁嘅價錢，真係企位都去。

萬惡的金錢 - 峇里島唱錢實戰篇

信者得救

懶咗好耐無寫blog喇！

啱啱上星期先係峇里島番黎，今次其實有極多嘢等住寫
但係早幾日咁啱係各大forum見到有好多人係峇里島唱錢有不愉快經驗
所以不如就先黎研究吓呢個問題先啦！

首先，我想同大家解開一個都市之謎

問題一：「到底我係咪要唱定美金去峇里？」

去旅行前做好準備 - 蔗渣價錢燒鵝味道Private Pool酒店篇

Pandan Tree Villa - 你幻想下你起身果陣係咁...係咪對生命又重拾信心?

香港人真係好鍾意食燒鵝
鍾意到一個程度可以令交通咁唔方便嘅深井變成景點
既然係咁, 今日就同大家一齊欣賞吓有燒鵝與蔗渣概念嘅嘅峇里villa~

去峇里旅行，好多人都認為必須要好似叉燒炳個仔結婚果陣時豪住villa
你份身家薄少少都咪駛旨意

但係對其他經濟實惠型嘅同學，並唔係打波先黎落雨嘅! 
今日我地就黎開心些牙一下幾百蚊都有private pool嘅villa啦！！！

住呢種又要平嘢，地點通常有少少唔太方便
所以出入你都要一係自己揸綿羊仔 or 安排交通

去旅行前做好準備 – 峇里島選擇酒店的藝術 (二)

我最愛嘅boutique hotel,恕我自私,如果你同我熟嘅我先話你知係邊 :)

前一篇廢話講咗一大堆，都係未入正題

今篇我地就黎入戲肉喇喂！

以下嘅所有長篇大論，如果你係錢多到駛唔晒果種，並且最緊要豪住villa，請自

動跳過。你可以去任何一個預定酒店嘅網站，用你嘅入住日期，再將個sorting set

做由最貴果間開始搵起 – 信我啦，收你最貴果間，service真係好好。

去旅行前做好準備 - 峇里島選擇酒店的藝術（一）

Tuga Hotel Bali, Canggu

各位同學，

今日同大家探討一個相當具爭議性兼大家都好期待嘅課題，就係....

我黎緊去峇里玩，有咩酒店suggestion?

呢個問題，我係各大網上討論區見過N咁多次
一模一樣嘅問題，無問多無問少
唯一分別可能只係「有咩酒店好建議」或「有咩villa推介」，純粹用字上嘅分別

每次見到有人咁問，我發現都無咩人reply
其實原因好簡單
並非各位去開峇里嘅巴打絲打有好嘢唔益你
只係.......你想我答你咩？
唔知你男定女幾大幾多人去去幾多日想去邊度玩去幾多日想感受點樣嘅旅遊經驗同埋最重要嘅係........你咩budget

如果話，思念是一種很玄的東西
大家無頭無尾咁問一句介紹住邊
簡直係一條比思念更玄的問題

幻想吓，有人（唔知男定女）係你耳仔邊問你「我應該著咩鞋好？」
如果你答得出仲要唔係hea佢嘅
你絕對有大師級嘅修為

冷知識衝動 - 峇里島之你估佢唔到

食住花生慢慢睇...

well, 個標題自己寫完都有少少汗顏，
實在有點兒似舊時無線眾多遊戲節目入面其中一個單元，仲要係安德尊主持果隻....

好，既然個頭已經開得咁老土，唔爭在套用埋最最最老土嘅一句

「好，我地去片！」

去旅行前做好準備 - Uber Bali

相信交通會係各位同學去峇里遇上最大嘅問題
係上幾篇嘅交通消息入面，有簡單提及係機場同埋平時搭的士時應注意事項 去旅行前做好準備 - 峇里機場 / 交通消息 

好多朋友都會選擇係峇里包車，特別係如果當日打算去Ubud一日遊之類
之但係如果你純粹只係想係市區 (例如係Kuta好，Seminyak又好) 搭的士
除咗要金睛火眼地搵街上嘅藍雀仔的士 (Blue Bird )，又或者係扎行晒馬準備同的其他士司機講價之外，仲有無其他文明少少嘅方法呢？

有，就係全能的Uber

萬惡的金錢 - 簡易印尼盾辨認大法 ++數學白痴專用編++

出門在外，錢係一件相當緊要的事。


via GIPHY

印尼盾身為世上幣值最細，而面額最大嘅貨幣之一；食餐飯一百幾十萬上落絕對係等閒事。
我相信不少數口精嘅同學們，幾多印尼盾對幾多港幣，絕對可以馬上就如神探加利略般計到 「哦~~~~呢餐飯300幾萬咪即係港紙千八蚊度~~」

但係好不幸地，上天亦係同時間製造咗一批，當數學神童係度計緊兌換率時，眼神完全渙散嘅一群天真無邪的小朋友

我就係其中一個

所以各位數學白痴嘅同學們，我地又黎上另外一課，就係如何在峇里使用現金溝通與消費。

前言

去峇里 / 印尼 / 呢類郁啲就一百幾十萬嘅地方，我絕對建議大家盡量用credit card - 一黎個rate其實唔太差，二黎你起碼唔駛袋咁多錢係身。基本上只係需要用現金搭吓的士、係小店買少少嘢，又或者係local shop食餐便飯時用

如果你飛得多，申請d 海外簽脹換多d里數嘅credit card亦好抵

同時亦建議大家係手機先行下載貨幣轉換計數機，呢個先係最可能比到個實數你

我以下嘅教學，只可以比你係短時間又唔需要用計數機嘅情況下，大概 知道幾多錢
並不適用於要求「哦~ 根據我係xxx用最好rate加免手續換嘅Rp., 呢餐飯一共係$381.2」嘅精算類同學

去峇里+++不該+++做的事 - 逆向思考式旅遊小建議

與本文相反，相信佢地係排緊隊去做應該做的事

如果要講「去峇里應該做的事」，上網大把類似文章，
同埋峇里可以做嘅事實在太多太多，完全取決個人style

HOWEVER

各位同學，我地今日不如一齊黎玩一個逆向思考嘅小遊戲
分享一下純粹以本人角度出發，我認為去峇里+++不該+++又或者係應該避免做嘅事



via GIPHY

去旅行前做好準備 - 峇里機場 / 交通消息

歡迎各位同學抵達峇里國際機場

係之前嘅基本資料篇入面有講過關於入境等等好基本嘅資料 (原文連結: 去旅行前做好準備 - 基本資料篇 )

當你到達機場，又過埋海關後，點算呢?

好，我相信你暫時只會擔心幾樣嘢，首先嘅係

有乜嘢會令你心花怒放？

錢！

係你過完海關，望住行李輸送帶嘅右手邊，你將會發現ATM機乙個。當然係機場入面仲有有幾間找換店，不過to be honest果幾間你唔好預佢個rate會好。

打卡呃Like

你可能已經開咗roaming / 係香港買咗電訊商嘅東南亞data Sim / 係香港租咗wifi 蛋 / 幫襯末來的我買咗當地電話上網卡 (無錯，我在此承認我的確打算係將來順便做埋呢類型小買賣！我係賣廣告呀~呵呵)

假設以前任何一項都無你份，而你打算唔駛上網 / 淨係番酒店先用wifi / 遲吓自己係街度自己買sim card等等等等....唔緊要，因為峇里機場係有免費wifi嘅，仲要基本上一落機已經connect到，訊號仲要相當之唔差添！

老老實實，我一直都對機場wifi有偏見，甚至發現越發達嘅地方，機場wifi就越差添！峇里機場入而嘅wifi訊號實在係令人喜出望外。

係排海關嘅同時，就可以補番之前成五個鐘無得上網嘅痛苦。

去旅行前做好準備 - 女性專用To Pack List

此刻的你，係咪已經好想係機場閘口打卡呢?

係咪已經有一種如箭在弦，不得不發嘅感覺呢?
大家係未出發之前，不如先研究一下去峇里玩到底要pack咩啦!

我呢篇並唔係上網copy 嘅"What to pack for holiday" 罐頭文章，所以要pack咩係完全根據我個人經驗與日常生活習慣，可能適合你，亦可能唔適合你；請大家根據個人口味再作加減。

基本事項

• 護照
• 機票 / 電子機票
• 酒店資料 (含酒店電話及地址)
• 機場Pick Up 聯絡人資料 (or 你可能自行決定搭的士)
• Support到你當地上網 / 聯絡嘅方法 (可以係你用香港roaming / 係香港買定東南亞上網卡 / wifi蛋 / 買定當地電話上網卡 - 廣告時段, 遲吓我有得賣)
• 國際車牌 - 峇里租車 / 綿羊仔好common, 如果有呢個打算，就算係租綿羊仔都必須要帶國際牌! 唔係怕佢唔租比你，只係怕你比交警截到罰錢罰死你 -  同埋touchwood 有咩事，無國際牌保險唔會賠
• 旅遊保險
• 錢 - 可以係香港唱定美金, 如果唔係特區護照，記得唱定35蚊美金做落地簽證 (2015年10月update: 其實港紙都ok, 唔一定要美金, 同埋BNO都免簽證費用喇)

行李硬件

• 有密碼鎖嘅行李篋
  (題外話: 我去大部份國家特別係東南亞地區，我多數都會用無細袋係出面嘅硬篋；原因係以前有聽講過有人被不法份子嫁禍, 係你唔留意時'sip' d 嘢係你行李嘅無上鎖位置。唔係話峇里治安唔好，只係呢種事仍然有可能發生。為保安全，請盡量保持行李跟身或用硬篋，如果有無法上鎖嘅細袋，係行李帶拎完行李後，請慣性拉開d細袋檢查一下)
• 你出街會拎嘅手袋 - 建議千祈唔好拎皮袋，越輕便越好。唔係驚乜，只係你如果拎個名牌靚手袋去，其實同峇里個feel 格格不入；同埋你個人好熱又出汗時，你係唔會想掂到皮袋der~
• 再細少少嘅袋，in case你去游水 / 沙灘 / 落車參觀一陣, 夠放你必須要跟身嘅就夠
• 除非你心目中有target特別要買某樣嘢，又或許你對峇里木雕 / 傢俱擺設好有興趣，否則唔駛番太多位放戰利品

去旅行前做好準備 - 超詳盡機票入手攻略

與機票無咩關係，只係我覺得呢位神明個樣相當可愛

出門旅遊，唔係話要一蚊一毫都計住晒，
只係如果自己「被水魚」，駛貴咗條氣就唔係好順。
去得峇里，通常筆直都預得高少少，但係都希望自己係響市場價之內

買機票去峇里，絕對係成個過程最天人交戰嘅思想過程之一
(當然如果你係駛黎駛去都係面頭果浸，平時去邊都係坐business class, fanfare / 廉航對你黎講係一個好陌生嘅concept, 請自動跳過呢篇)

點解天人交戰呢? 最主要原因係 機－票－貴－!!

機票貴呢個問題係相對嘅

本身以性價比嘅角度出發，峇里係要坐成五個鐘飛機，搭多幾個字飛機就可以去到澳洲咁滯 (我知係誇張d, 但係Darwin得喇啩?)
對於未深入認識峇里嘅同學，會認為峇里同布吉 / 芭提亞 等等係差唔多嘅地方

當泰國 / 台灣 / 日本機票長期做緊一千幾百蚊來回連稅之時
你同我講去峇里基本價要四千幾蚊!?

無錯，直航去峇里嘅「膽價」的確係四千幾，旺季更貴 (最近CX唔知痴咗邊條線，搵親要上到五千添)

所以，我第一個結論係: 直航如果你見到低過四千蚊，時間又就到你，唔好諗喇，買啦。

去旅行前做好準備 - 基本資料篇

很想要吧?

當你精神上已經放緊假, 但係肉體仲係公司嘅時候,先幻想吓自己攤咗係上面個bean bag啜緊椰青或啤啤ing

身為一個非常personal嘅旅遊資訊, 我決定由基本資料開始講起。之後再同大家慢慢由你想放一個點樣類型嘅假期, 而去慢慢研究。


同學們, 就當你對峇里完全無認識開始

老土dd, 先黎個fact sheet

機場

峇里個機場Code 係DPS, 正式個中文叫伍拉·賴國際機場, 英文係Ngurah Rai International airport. 不過老老實實, 我個腦容量有限, 唔係有google我都唔會記得佢全名, 大部份正常人類都暱稱佢為峇里機場又或者係Denpasar International Airport.

(冷知識衝動: 當你人在峇里, Denpasar呢個地方將會經常係你字典度出現。Denpasar中文係登巴薩, 發音類似「釘趴沙」, 源自荷蘭文, 即係市場咁解。屬於島上嘅舊區, 但係又相當熱鬧同埋相當local, 有少少深水埗crossover廟街之感。佢係峇里最大一個市, 舊名可能大家都聽過, 就係叫---巴東)

萬丈高樓平地起 - 我與峇里島的緣

係blogspot 開咗個blog 好耐, 但係一直都的唔起心肝開始寫
個心入面其實每日都有大堆有關峇里的人同事想分享
你可能會想問, 點解我會想開一個咁既blog / facebook page?

我係一個旅行怪, 從來去邊度都唔跟旅行團
我覺得無論去邊都好, 有時間就上網搵資料, 無時間就去Circle K買本閃令令旅遊書
你唔知足十成都起碼清楚七成知道自己去到果度大約可以點
但係峇里呢個地方, 我接觸後先發現市面上其實係無咩真係好好用既資料
大部份既旅遊書, 我懷疑寫果個都未去過
網上搵到既亦只係得台灣forum 又或者係用英文睇tripadvisor
要搵同聲同氣既好難

第一次去峇里, 我係抱住戰戰兢兢既心態去0既
事實上我未去之前, 我唔知道佢同泰國到底有咩分別 (除0左機票貴d , 搭耐d飛機同埋無泰國菜食之外...)
我亦記得我好大口氣地曾經同朋友講話 「唓!!印尼有咩好去, 咪又係陽光與海灘! 你慌個太陽唔同樣咩.....」