個心入面其實每日都有大堆有關峇里的人同事想分享
你可能會想問, 點解我會想開一個咁既blog / facebook page?
我係一個旅行怪, 從來去邊度都唔跟旅行團
我覺得無論去邊都好, 有時間就上網搵資料, 無時間就去Circle K買本閃令令旅遊書
你唔知足十成都起碼清楚七成知道自己去到果度大約可以點
但係峇里呢個地方, 我接觸後先發現市面上其實係無咩真係好好用既資料
大部份既旅遊書, 我懷疑寫果個都未去過
網上搵到既亦只係得台灣forum 又或者係用英文睇tripadvisor
要搵同聲同氣既好難
第一次去峇里, 我係抱住戰戰兢兢既心態去0既
事實上我未去之前, 我唔知道佢同泰國到底有咩分別 (除0左機票貴d , 搭耐d飛機同埋無泰國菜食之外...)
我亦記得我好大口氣地曾經同朋友講話 「唓!!印尼有咩好去, 咪又係陽光與海灘! 你慌個太陽唔同樣咩.....」
結果去完之後, 我完全對呢個地方改觀
峇里無錯係有陽光與海灘
但係仲有更多比陽光與海灘吸引我既地方
就算佢既陽光與海灘, 係質感上亦令我未能忘懷
*脷伸 : 我***並唔係***陽光與海灘bikini 型
峇里令人唔'旅遊friendly'既地方, 在於公共交通工具未配合得好好
而逢星期二果d機票大特賣又好少有佢份
但係另一方面, 就係由於呢個原因
峇里仲有好多地方未被過份"污染"
講白dd, 即係你只要懂得選擇, 你仍然可以全程聽唔到廣東話, 又或者係"大媽less" 0既
旅行嘅嘢你懂的.....唔係歧視, 只係如果你係好想聽廣東話, 你就一早跟咗康泰, 唔係上網周圍搵資料啦...right?
係呢度, 我會分享我的遊記, 亦會分享一d我覺得好食好買好去既地方。老老實實, 大部份都唔係好typical 既地方, 而係我覺得好適合我口味要求嘅地方
好, 就趁今日係適逄印尼獨立日大喜, 就寫落第一篇, 希望我可以慢慢寫, 密密寫, 令呢度成為最齊全又最適合香港人既峇里Travel Blog :)
 |
| 人人話峇里海灘靚, 我就話佢山景仲靚!!! |
至於點解我會成日去峇里? Well, 好簡單, 係因為我遇上咗我嘅命中剋星,而佢亦係陰差陽錯嘅情況下滯留咗係峇里。係未諗到大家點解決距離嘅情況下, 唯有扮住牛郎同織女先.....(咁樣諗會覺得美化dd xDDDDD)
如需轉載請列明出處
如果想留意多d有關峇里既資訊, 請多多支持去我地嘅facebook page比個like! :)
https://www.facebook.com/withlovebali
沒有留言:
張貼留言